موضوع النهاردة عن إعلان Vodafone Egypt العيلة الكبيرة، رمضان 2016وعلشان نفهم الي  فودافون  بتعمله خلينا نمشي خطوة خطوة مع موضوع الإعلان .. إعلان فودافون (العيلة الكبيرة) لما تشوفه لازم هيجي في بالك سؤال مهم،

– هو ليه فودافون بتصرف كتير كدة على إعلاناتها

مقارنه بمنافسيها في نفس المجال Etisalat Misr و Orange ..
 

وليه دايماً بتتعمد ظهور نجوم كبيرة أو نجوم الصف الأول في إعلاناتها ؟

والإجابة: المعروف في عالم التسويق | Marketing انها عملية بتتم وفق لمجموعة خطط منها الي بيكون على المدى القصير ومنها إللي بيكون على المدى البعيد، وكمان أحياناً بيكون الــ Objective أو أحد أهداف التسويق (مش زيادة مبيعات او ترويج منتجات أو خدمات) لاء في هدف مهم كمان أسمه Brand Positioning وهي بأختصار شديد، خلق وضع او صورة ذهنية معينة في عقول الــ customers أو العملاء عن البراند ..فودافون.
ومن أول نظرة للـ Slogan بتاع فودافون (القوة بين إيديك) هتفهم ان فودافون بدأت المرحلة دي علشان تركز على Brand Positioning وتثبت فكرة انها الشركة الأقوى عالمياً ومحلياً في عقول كل الــ customers بتوعها أو انها الشركة الــ First Class علشان تحفز عملائها الحاليين في الإستمرار والإعتزاز بأنهم جزء من البراند، أو ولكسب وجذب عملاء جدد سواء على مستوى الافراد أو الشركات .. لكن ده هدف جانبي جنب Brand Positioning.
وعلشان نشوف الصورة أوضح هنرجع بالزمن شوية ونتعامل مع إعلانات فودافون بتايم لاين ونركز على رمضان هنلاقي أن فودافون بدأت خطتها التسويقية الي هدفها Brand Positioning من رمضان 2011 ..!! مش من السنة إللي فاتت زي ماالناس مُتخيلة.
 

طيب هنلاحظ ده إزاي ..؟

الموضوع بدأ لما فودافون بدأت Slogan (القوة بين إيديك) سنة 2010، وحبت تبدأ الحملة بإعلانات خفيفة في رمضان وعودة للتراث من خلال اعلانات عرائس الماريونت إللي ليها شعبية كبيرة في نفوس كل المصريين .. وكان حملة اعلانات حلوة فعلاً ، لولا تدخل شركة #إتصالات وقتها بإعلان قوي جداً وإللي جابت فيه نجوم كتير كلهم نجوم الصف الأول زي يسرا ومحمد منير واحمد عز وعزت ابو عوف وهند صبري ودنيا سمير غانم في صدمة قوية غطت على كل أعلانات رمضان ده .. رغم أن موبينيل المنافس التالت كانت عاملة حملة أعلانات قوية جداً وجملية جداً بإستعراضات مبهجة (إتكلم من القلب) وحققت صدى كويس في الشارع المصري، لكن لسوء حظهم انهم نزلوا في شهر واحد مع اعلان إتصالات العملاق المُبهر، وقتها .
تعالوا نرجع بالذاكرة ونشوف الـ 3 إعلانات 🙂
أعلان فودافون رمضان 2010
أعلان إتصالات رمضان 2010
إعلانات موبينيل رمضان 2010
وطبعاً بعد إعلان إتصالات الضخم وإللي بيرسخ لنفس الهدف إللي بتسعى ليه فودافون وهو Brand Positioning رغم أن إتصالات وقتها كانت شبكة جديدة على الشعب المصري وبقالها في السوق 3 سنين بس، وتعمل إعلان زي ده ..!! أصبح عرش فودافون إللي لسة بتأسس ليه أصبح في خطر ..!!
ومن هنا بدأت ضربات فودافون القوية تتوالي لتأسيس الهدف المنشود ان فودافون هي شركة الفرست كلاس .. أو الصف الاول وهو ده الــ Goal . المطلوب.
وكانت البداية بإعلان الزعيم عادل إمام، بعد رمضان بــ3 شهور (للرد على إعلان إتصالات) وإللي كان بيعتمد على توصيل الرسالة من خلال المؤثر السمعي Voice Over وكان كل الكلام مغزاه ومعناه ان فودافون هي القوة وهي رقم واحد في مصر . 🙂
– أعلان فودافون .. عادل إمام – ديسمبر 2010

* ثم في رمضان 2011

كملت فودافون تأسيس لهدفها من خلال إعلانات (شكراً) بالنجمين سمير غانم ونيللي، في حين موبينيل عملت إعلانتها في رمضان بالمطرب حسن الاسمر .. وإتصالات المعلق محمود بكر رحمة الله عليه.
* وفي رمضان 2012
فودافون زودت العيار أوي 😃 وعملت حملة رمضان 2012 بــ 12 نجم من نجوم الصف الاول حملة ( الديكور وقع ) ونجوم الحملة دي كانوا (محمد منير – فاروق الفيشاوي – سامي العدل – سمير غانم – معتز الدمرداش – احمد الفيشاوي – سوسن بدر – كريمة مختار – مظهر أبو النجا – درة – المذيعة انجي علي )
ورغم ان المنافس موبينيل كان عامل اعلان قوي وثبت في مخ الجمهور جداً (دايماً مع بعض) بأغنية ذكية استهدفت جميع شرائح الشعب المصري. لكن قوة حملة فودافون كانت صعب التغلب عليها 🙂 ونفس الحال مع حملة إتصالات الخفيفة الي عجبت ناس كتير (الصراحة وخدمة العملاء) لكن فودافون أكتسحت.
* في رمضان 2013 بقى .. حصل حاجة مختلفة شوية. 😃 (لعبوا تبديل الكراسي مع بعض)
فودافون لقت أن اعلان موبينيل (دايماً مع بعض) وإللي إستهدفت فيه جميع طبقات الشعب المصري، وأبرزت فيه أهم القيّم الإنسانية إللي بيتميز بيها الشعب المصري عن غيره من الشعوب ، وكمان قدروا يوصلوا الرسالة للكل لدرجة انهم جابوا مغنيين شعبيين في الاعلان (أوكا وأورتيجا) والإعلان حقق نجاح كبير جداً، وبمصاريف أقل بكتير جداً من الي فودافون بتصرفها، فا حبت تستثمر نجاح موبنيل بأنها تلعب على نفس التراك .. وقللت المصاريف جداً، وخلت حملة رمضان عبارة عن اغنية بصوت محمد منير، ومؤثرات بصرية كلها من مواقف يومية مصرية فيها روح التعاون والحب (حملة كتر شيرك).
لكن كانت المفاجأة بقى أن موبينيل عملت العكس تماماً، 😃 وعملت حملة رمضان 2013 بالنجم كريم عبد العزيز، ويوسف عيد و ريهام أيمن (حملة عروض ملهاش نهاية) وكمان كانت حملة غالب عليها الطابع الكوميدي الخفيف وإللي ساعد جداً أنها تعلّق جداً مع الجمهور وتحقق صدى كويس جداً وصدمة جامدة لكل الي كانت بتبنيه فودافون في السنين إللي فاتت، وبكدة هتضطر ترجع للتراك بتاعها بسرعة، علشان تحافظ على الــ Brand Positioning إللي بقالها 3 سنين بتصرف عليه وتأسس ليه. 😃
أعلان فودافون رمضان 2013
إعلان موبينيل رمضان 2013

* رمضان 2015 ..

رجعت فوادافون للتراك بتاعها تاني وقالت مش هنجازف تاني، وهنكمل في Brand Positioning بنجوم الصف الأول وعملت أعلان قوي جداً (قوتك في عيتلك) وإللي أستعانت فيه بــ 11 نجم وهما ( مصطفى فهمي – حسين فهمي – دلال عبد العزيز – إيمي سمير غانم- محمد عدوية – أحمد عدوية – ميس حمدان – مي سليم – مجدي عبد الغني – هشام سليم – يسرا ) طبعاً مع ضعف المنافسة من إتصالات إللي حاولت تضرب ضرب مباشر بطريقة (قصف الجبهة) في إعلان فودافون وكمان بأنهم ياخدوا شخصية الجنيّ منهم ويحول لإتصالات، لكن فكرة إعلان إتصالات فشلت لسببين -1 – ثقافة الشعب متقبلتلش الفكرة تماماً (رغم ان الاسلوب ده رائج ومنتشر جداً بين البراندات العالمية) 2- فوادافون عارفة أيه إللي بيبهر الشعب المصري وعملته، فا بالتالي اي محاولة اقل ابهاراً حتى لو كانت أحسن بس مش مصروف عليها بنفس القدر تقريباً هتفشل.
وكمان ضعف المنافسة من موبينيل إللي كررت فكرتها (إللي بقت مستهلكة) من خلال حملة (فاعل خير) .. وإللي تقريباً محدش يفتكرها.
 

* أظن دلوقتي الصورة بقت واضحة

ليه فوافون عاملة أعلان بالشكل ده، وليه بتتعمد تصرف على إعلانتها بشكل مبالغ فيه أحياناً .. رغم ان أعلان السنة دي 2016 وإللي أثار جدل كبير ، هو أقل في التكلفة فعلياً من حملات تانية فاتت .. زي مثلاُ حملة رمضان 2012 (الديكور اتكسر) إللي كانت عبارة عن 4 إعلانات .. أتصوروا بــ 12 نجم وتصوير خارجي وداخلي. فا ميزانية الحملة دي، فعلياً تتخطي ميزانية أعلان السنة دي بالضعف تقريباً.!!
الفكرة كلها في ترسيخ الصورة الذهنية للعملاء .. الفكرة في الـ Brand Positioning ان فودافون هي شركة الــ First Class وده إللي ناجحة فيه فودافون حتى الآن في مجالها. 🙂
– وبالمناسبة أعلان السنة دي (العيلة الكبيرة) هو إمتداد إعلان السنة إللي فاتت (قوتك في عيلتك)، وواضح أن السنة الجية هيكون في إمتداد تالت لموضوع العيلة مع فودافون، لأنها قررت توصل للجمهور عن طريق العيلة (الجانب الإجتماعي) و القوة (الجانب النفسي) .. 🙂 أعتقد وبنسيبة كبيرة فودافون السنة إللي جاية هتدخل معاهم الجانب التالت (الجانب العملي) علشان تكون حاصرت عملاءها بجميع الجوانب 🙂
جايز .. مش بعيد على فودافون .. قادرة وتعملها 😃

نختم موضوعنا بشوية معلومات عن إعلان فودافون:.

– مخرج الإعلان: تامر مهدي (مخرج كليب ـ أوبريت مصر قريبة)
– عدد النجوم في الاعلان: 11 نجم
– نجوم الإعلان بيمثلوا 75% بس من الإختيارات إللي كان عايزها المخرج، اما النسبة الباقية هي إختيارت كانت مفروضة على المخرج، من وكالة الإعلان والشركة المعلنة (فودافون) إللي كانت متمسكة بيهم .. وهم (شيرين – سمير غانم – أحمد السقا).
– ميزانية الإعلان التقرييبة .. 55 مليون. (أرقام تقريبية غير مؤكدة قد تزيد وقد تقلّ)
– جميع ديكورات الإعلان (شوارع بيوت – زينه – أنوار) ليست حقيقية وجميعها “جرافيك” بإستثناء المنزل المكون من طابقين إللي بيتم التصوير داخله .. فقط هو الحقيقي .. 😃
– تم تصوير الإعلان في ستديو خاص بمدينة 6 أكتوبر ولمدة 3 أيام وكانت مساحة غرفة التصوير 300 متر فقط .
– تم الإعداد للإعلان في شهر فبراير 2016 (أي ما يقرب من 3 شهور قبل التصوير)
– تم تنفيذ الإعلان في ثلاثة أيام (18 – 19 – 20 مايو 2016) أي قبل شهر رمضان ب 15 يوماً فقط.
– بعد تصوير الإعلان “بالكرومة” تم إرساله لشركة جرافيك متخصصة في #فرنسا لتكملة الإعلان بالجرافيك، ليظهر في صورته النهائية التي يُعرض بها الآن.
– إستعراضات الإعلان تم التدريب عليها لمدة 3 أسابيع متواصلة، في حين أن الفنانين تم تدريهم على الإستعراضات في نهار يوم التصوير فقط .. لضيق الوقت.
ولحد هنا خلصنا كلامنا عن إعلان فودافون. 🙂
 
——————–
تم كتابة هذا المقال بواسطة محمد جمال عام في رمضان 2016
على منصات وموقع  Sara Advertising
الرابط: https://www.facebook.com/saraadegy/photos/a.167720929996023/824554730979303/